КАРАВУКОВО – Вовторок, 19. марца младши пионире Фодбалского клуба Русин одбавели два пририхтуюци стретнуца процив екипи Полету зоз Каравукова.
Перше стретнуце бавели хлапци возросту 2012. и 2013. рок и тото стретнуце ФК Русин страцел зоз резултатом 3:1.
За Русин наступели – Андрей Виславски, Алексей Виславски, Дарко Еделински, Тони Колошняї, Ален Бики, Ерик Русковски, Алекс Цвайґ, Стефан Арва, Теодор Гарвильчак, Тони Надь и Давид Колошняї. Ґол за Русин дал Алекс Цвайґ.
На другим стретнуцу бавели дзивчата хторим помогли и хлапци, а тото стретнуце тиж страцела екипа Русина зоз резултатом 2:1. Ґол за Русин дала Николина Гарди.
За мишану екипу Русина наступели – Клара Блаґоєвич, Николина Гарди, Адрияна Штранґар, Леонтина Еделински, Зара Малацко и Миа Сабо, а на стретнуцу мали помоц и од даскельих хлапцох.
Треба надпомнуц же екипа зоз Каравукова у другим стретнуцу мала лєм єдно дзивче у екипи, так же ше може повесц же гоч и резултат то нє гутори, наша мишана екипа одбавела одличне стретнуце.
Зоз тима двома стретнуцами, закончую ше пририхтуюци стретнуца и на соботу почина першенство за младших пионирох. Слово о Розвойней лиґи за младши катеґориї, дзе участвую дзешец клуби зоз Кулскей и Вербскей општини.
У першим колу Розвойней лиґи младши пионире Русина, на соботу 23. марца буду бавиц у Сивцу процив екипи Полету. Заплановане же би ше одбавели шейсц стретнуца, а буду участвовац дзеци возросту од 2012. по 2017. рок.
Стретнуца почню од 15 годзин.