РУСКИ КЕРЕСТУР – Старши особи зоз Коцура, Нового Саду и Руского Керестура ше всоботу пополадню дружели и баловали у велькей виронаучней сали на Каритасовим балу.
Присутних привитал керестурски парох о. Владислав Варґа и указал на потребу друженя, зєдиньованя у шицких сферох чловекового живота.
Волонтере Каритасу за учашнїкох на балу пририхтали слану и слатку закуску, ошвижуюци соки, варену сладку кукурицу, понукли им и кафу. Шицки були крашнє вигосцени. Тиж так ше потрудзели и орґанизовали рижни интересантни бависка: рулет танєц, вибор за найкрасшу манекенку и змаганє у танцованю, а таноцовало ше твист! У каждим бависку наградзени достали пригодни награди. За одличну музику були задлужени Юшово музиканти.
Пристуни на балу мали лєм уживац, вешелїц ше и дружиц. Єдно прекрасне пополаднє нє лєм за старших, алє и за волонтерох, та шицки пошли дому полного шерца.