РУСКИ КЕРЕСТУР – У Основней школи „Петро Кузмяк” вчера представена репринт кнїжка за дзеци Мирона Будинския „Воденїчка на стриберним потоку” з илустрациями його унуки Лари Петкович, котру тих дньох обявела НВУ „Руске слово” з Нового Саду.
Промоция отримана двом ґрупом школярох, I и II класи, а вец III и IVкласи, у парку опрез школи при бисти Петра Кузмяка. Часц промоциї було же на початку школяре там посадзели два древка явора, вєдно з редакторку виданя Ясмину Дюранїн.
Вона им потим през барз интересантну интерактивну роботню у котрей школяре дзечнє участвовали, представела тоту кнїжку приповедкох котра першираз обявена 1970. року, а на концу кнїжку кажди школяр достал на дарунок.
НВУ „Руске слово” средства за видаванє тей кнїжки достала прейґ проєкту „Култура=кнїжка=природа – интеркултурални роботнї за дзеци” при Буджетским фонду за национални меншини Министерства за людски и меншински права и дружтвени диялоґ Републики Сербиї. Прето, попри кнїжки, обявена и роботна тека у хторей три приповедки преложени на сербски язик, а илустрациї мож вифарбйовац.
