РУСКИ КЕРЕСТУР – На соботу 29. априла на 14 годзин, будзе отримани Явни ярнї тренинґ на базену у Руским Керестуре. Мото тренинґу „Порушай ше, направ перши крочай… опредзель ше за здрави живот”.
Иницияторка тренинґу Мария Гарди котра водзи тренинґи вежбаня „Fitness walk” (Фитнес вок) ґрупи котра активно тренира у Спортскей гали. У тим ю орґанизацийно потримує Месна заєднїца Руски Керестур, а тиж и други тренере рекреативних ґрупох и дзепоєдних Клубох СД „Русин”.
На Явним тренинґу наступя школяре з Атлетского и Карате клубу „Русин” котрих водза тренере Саня Еделински и Михал Орос, наступя и учашнїци двох старосних ґрупох „Рекреациї за жени” котрих водзи Лїляна Еделински, ту будзе и ґрупа „Fitness walk” Гардийовей, a госци буду и Фетнес ґрупа „Порушай ше” з Нового Саду котру водзи Йована Симич.
Попри тим будзе орґанизовани и мини маратон длужини 3 км „Беж за здравє” котри орґанизує Ясна Тасич, а орґанизатор наглашує же учашнїки нє муша пребегнуц цалу длужину, алє спрам своїх можлївосцох.
Здраве костиранє презентує нутриционистка Михаела Милинкович, будзе и здравей поживи за учашнїкох, а Явни тренинґ потрима и вецейнїста шветова шампионка у бодибилдинґу Илона Зарубица.
На Явни тренинґ поволани жителє шицких ґенерацийох, та и цали фамелиї, бо активносци будзе за каждого по дацо. Циль Явного тренинґу мотивовац цо вецей особи на гоч яке рушанє котре приноши хасен и за физични и психични живот каждого.