КОЦУР – Шаховски клуб „Омладинєц” зоз Коцура закончел ярню часц першенства у стредку таблїчки, а на єшень шахисти предлужую далєй. По словох предсидателя коцурского Шаховского клубу Янка Бесерминя, одбавели пейц змаганя, од котрих три страцели, а два победзели. З оглядом же екипа бавела досц ослабена, як додал, муша буц задовольни зоз посцигнутим резултатом.
У єшеньскей часци першенства коцурским шахистом будзе достаточно же би єдну од штирох партийох победзели же би остали у лиґи, як и у стредку таблїчки, дзе су тераз. Шаховски клуб зоз Коцура дзелї шесте и седме место, од вкупно дзешец, кельо ше находза на таблїчки.
Финансийна ситуация досц чежка и вше є чежша, а општина Вербас того року помогла коцурски Шаховски клуб зоз 60 тисячи динари. Як гварел предсидатель Бесерминї, то нєдостаточно, алє финансую ше и сами, знаходза ше як знаю, покля єст моци, лєм же би Шаховски клуб „Омладинєц” зачувал свою длугу традицию и нє загашел ше.