КОЦУР – У грекокатолїцкей церкви Успения Пресвятей Богородици у Коцуре вирни преславели швето Рождество Христово – Крачун.
У коцурскей парохиї на Крачунску Вилїю, 6. януара, служене Крачунске всеночне.
На перши дзень Крачуна, 7. януара, шицки Крачунски служби були прикрашени зоз шпиваньом колядох числених парохиянох котри з нагоди того швета були у церкви. Вельку Службу Божу служел парох коцурски о. Владислав Рац, и вирним пренєсол винчованку владики кир Георгия Джуджара за шветo Рождества Христового.
Найрадоснєйше християнске швето и того року провадзене зоз колядованьом у велїх домох. Коляди шпивали и тамбураше, алє и дзеци и млади котри ходза по шпиваню и винчованю.
Нєшка, на други дзень Крачуна, Собор Богородици и Обручнїка Осифа, а на шицких Службох Божих того дня будзе мированє. На 10 годзин будзе Архиєрейска Служба Божа, та Крачун з вирнима у Коцуре преслави наш владика кир Георгий Джуджар.
Крачун у Коцуре означую и православни вирни. У порти коцурскей православней церкви Успения Пресвятей Богородици на Вилїю и того року традицийно палєни бадняк. На палєню бадняка, котре закончене зоз огньометом, були числени православни парохиянє.
