ВЕРБАС – Жатва ярцу вироятно будзе закончена по конєц того тижня, кед же хвиля допущи. Штреднє по гектару зродзело коло 6 тони, a урожай и квалитет задоволююци, гваря продукователє.
За тераз одкупна цена ярцу барз мала, спод шицких очекованьох. Кед жатва почала статкови ярец бул 15 динари, а тераз є коло 16,5 динари за килу.
У Южнобачким реґиону, та и у општини Вербас було векши поверхносци под пивским ярцом, як под статковим, медзитим, за тераз ше нє зна одкупна цена. Звичайно одкупна цена пивского ярцу за 5 одсто векша як цена жита.
Продукция законтрачена зоз Сладарню „Суфле” (Soufflet Srbija d.o.o.) зоз Бачкей Паланки, алє проблем же того року пивски ярец ма вецей протеини (стандард до 11,5 одсто). Одкупйовач, „Суфле” превжал шицок ярец и продукователє ше наздаваю же ришенє будзе прилаплїве обидвом боком.
Зоз житом вєшенї зашате вецей як 700.000 гектари и урожай добри. Понеже нє предате анї лоньске жито, хторе тераз ма цену коло 22 динари и нє извесне як будзе випатрац одкуп тогорочного жита бо 22 динари нє закрива анї трошки продукциї.
Жатва жита почала тих дньох. По калкулациї Задружного союзу Войводини вкупни трошки продукциї жита тогорочного урожаю по гектаре, з очекованим штреднїм урожайом од 5.000 килограми, виноша 33,30 динари.
Клуб 100Плус, чийо члени польопривредни продукователє хтори маю, або робя вецей як 100 гектари жеми, вимага од держави же би Републични робни резерви одкупели жито голєм по 32 динари, цо продукцийна цена за 2023. рок.
Польопривредни продукователє гваря же жито треба же бу було по коло 40 динари, бо муша на нїм и заробиц, алє и прето же до ньго од єшенї по жатву уложени драги репроматериял, чия цена формована спрам цени жита вєшенї од 38 до 40 динари.
