Маґарец

автор А. Бучко
654 Опатрене

Паметаце же сом ище у „Горору за принцези” подзелєла „потенциялних” на маґарцох, кремпити и принцох?

Теди сом роздумовала о манирох, справованю, порозуменю, алє гей, и о почитованю.

Теди сом нє роздумовала праве на тот способ, знала сом же маґарци – маґарци, и нє подумала сом же нательо потрафим.

Нє маме право уходзиц до нїчиїх животох и коментаровац их. Пре просту причину, а то же нє знаме цо ше у нїх случує.

Нє знам як то нє може буц дакому ясно. И одкадз себе дахто вежнє за право же би ше видзвигнул над нами и коментаровал нашо вибори або животни обставини. Кажде ма свойо, жиє зоз нїма и пробує поробиц найлєпше як зна и може.

Углавном, кед слово о маґарцох, а тих дньох зме мали слова о маґарцох и ботох. Медзи иншим, Руснаци, кельо вас єст? На списку сце. Мам барз важне порученє за вас:

  1. Нїхто нє ма право уходзиц до нїчиєй плоднїци.
  2. Дзеци ствар двох особох и лєм тих двох особох хтори их и ЖАДАЮ.
  3. Єст особи хтори нє жадаю буц родичи – и то У ШОРЕ!

4. И вироятно и найболяцше – єст людзох хтори тоти дзеци жадаю так же анї задумац нє можеме. И нє можу их мац. Бо им нє признати звонкамалженски заєднїци. Бо нє можу остац ваготни. Бо остали у другим шоре, а шерцо вчас престало дуркац. Бо остали у другим шоре, порихтали шицки шматки, посцелку, кочик – а шерцо престало дуркац.

То таки боль… Же ме болї и слизи ми чуря док пишем тоти слова, а нє дожила сом нїч од того.

Маґарцу!

Становиска висловени у тим тексту виключно авторово и нє вше одражую ушорйовацку политику новинох „Руске слово”.

ПОВЯЗАНИ ТЕКСТИ