КОЦУР – У Грекокатолїцкей церкви Успения Пресвятей Богородици у Коцуре вчера, на други дзень Крачуна, означени Собор Богородици и Обручнїка Осифа. На шицких богослуженьох того дня було мированє.
Вельку Службу Божу на 10 годзин служел парох коцурски о. Владислав Рац, а цале Богослуженє зоз шпивом провадзел Церковни хор и хор вербаского КПД „Карпати”.
Возвелїчаню найрадоснєйшого християнского швета того дня допронєсло и госцованє хору зоз гудацми. Зоз шпивом, музику и прекрасним колядованьом прикрашена святочносц Крачуна у коцурскей церкви.
На вовторок, треци дзень Крачуна, Вельку Службу Божу на 10 годзин будзе предводзиц наш преосвящени владика кир Георгий Джуджар.
