На коцурскей церкви будзе нови криж

автор Ол. Русковски
174 Опатрене

КОЦУР – У грекокатолїцкей парохиї у Коцуре у остатнїм периоду окончени велї роботи на реконструкциї Церкви Успения Пресвятей Богородици.

У прешлим року церква достала и нови випатрунок, закончена фасада, алє вкупна обнова тирвала коло 10 роки. Обилєна є, защицена од влаги, а роботи окончени и у олтару. Перше ше омальовало олтар 2019. року, шлїдуюцого року омальована цала церква з нука и ошвижени шицки слики, з тим же остало ище даскельо слики котрим потребне реставрованє.

Того року плановане же би ше заменєло иснуюци криж на церковней турнї и положело нови, а парох коцурски о. Владислав Рац, як и шицки парохиянє, горди на тото. Криж ше уж находзи у парохиї, а сцигол зоз України. Уж ше роками планує заменїц тот котри ше тераз находзи на церкви. Концом прешлого року контактована особа зоз Суботици, по походзеню зоз України, и о даскельо тижнї сцигол и криж.

По словох о. Раца, криж робени у Донєцку, а як порадзене, принєшени и криж и яблуко (куля) на комбию зоз України и затераз ше чека вигодну хвилю. З оглядом же тота робота нїяк нє єдноставна, треба стари криж зоз церкви демонтовац и зняц, тиж и громобран, же би ше на добри способ положело тот будуци нови. Єст можлївосци як то треба зробиц, алє док ше спатри и добре порадзи з майстром, прето же би ше шицко добре защицело и горе, и же би то було тото цо би шицки вєдно у Коцуре любели – же би на красней церкви конєчно бул и красни криж, гварел з тей нагоди о. Рац.

Криж направени з окремного материялу, уж є позлацени и ґарантує ше його длуговичносц. Поведзене було же криж направени зоз такволаного материялу булат. Вон випатра як кед би бул златни, плех такволани прохромски и зоз златну фарбу, и за тот криж ше дава ґаранция 60 роки.

Шицки роботи на Прокатедралней церкви Успения Пресвятей Богородици у Коцуре конєчно буду закончени и заокружени по поставяню нового крижа на церковну турню.

ПОВЯЗАНИ ТЕКСТИ