НОВИ САД – У конференцийскей сали доо „Мадяр со”, вчера, 18. децембра, була конференция „Меншински медиї у диґиталней ери” хтору вєдно орґанизовали Новинско-видавательни установи на мадярским язику „Мадяр со” и на словацким язику „Глас люду”.
На Конференциї були отримани два панели. Перши панел бул пошвецени комуникацийним платформом меншинских медийох, а на другим були у фокусу виволаня и ришеня у сучасней ери у медийох на язикох меншинских заєднїцох.
Присутни були и подпредсидатель Покраїнскей влади и покраїнски секретар за образованє, предписаня, управу и национални маншини – национални заєднїци Роберт Отот и помоцнїца секретара покраїнского секретарияту за културу, явне информованє и одношеня з вирскима заєднїцами Тамара Ґуя.
Спред НВУ „Руске слово” на конференциї участвовала редакторка Новинскей аґенциї „Рутенпрес” Вероника Вуячич, хтора на другим панелу бешедовала з якима ше почежкосцами вона зочує у роботи.
По законченю Конференциї, учашнїки обишли новоотворени музей Новинско-видавательни установи „Мадяр со”, хтори отворени у просторе бувшей друкарнї дзе приказана богата история тей установи.
