ШИД – У општини Шид у грекокатолїцких церквох торжествено зоз молитвами и колядами означенє найрадоснєйше швето Крачун.
У Шидзе школски дзеци хтори порихтала наставнїца Наташа Еделински Миколка ходзели по шпиваню, а перше коялдовали у Парохиї, а потим и у обисцох вирних хтори их чекали и привитали.
У церкви Преображеня Господнього Саночне на 22 годзин служел парох о. Михайло Режак, було присутне красне число вирних, а после єдна часц вирних пошла до Руского дому и предлужела друженє. На перши дзень Крачуна о. Режак служел Службу Божу на 10 годзин и пречитал крачунску винчованку преосвященого владики кир Георгия Джуджара.
У церкви Собору святого архангела Михаила у Беркасове и Успеня Пресвятей Богородици у Бикичу, Саночне служел парох о. Владимир Еделински Миколка, а у Бикичу по шпиваню ходзели два ґруши шпивачох и колядовали вирним. Богослуженя були и през други днї швета.
У церкви Святого апостола и евангелисти Луки у Бачинцох парох о. Юлиян Рац служел Саночне на 21 годзин, церква була оквицена, модлєло ше и шпивало коляди, а о. Рац служел служби и през крачунски швета.
