ОПШТИНА ШИД – На швето Квитна нєдзеля або Уход Исуса Христа до Єрусалиму, внєдзелю, 5. априла було торжествено у грекокатолїцких церквох у општини Шид.
У Шидзе у Церкви Преображеня Господнього Службу Божу служел и на початку богослуженя багнїтки пошвецел парох о. Михайло Режак визначуюци значносц того швета як здогадованє на Исусов уход до Єрусалиму.
Торжествено було и у наших церквох Собору святого архангела Михаила у Беркасове дзе Службу Божу служел и багнїтки пошвецел парох о. Владимир Еделински Миколка як и у Церкви Успеня Пресвятей Богородици у Бикичу.
Квитна нєдзеля зоз Службу Божу хтору служел парох о. Юлиян Рац и зоз пошвецаньом багнїткох означена и у Церкви святого апостола и евангелисти Луки у Бачинцох.
