11. СЕПТЕМБЕР – На нєшкайши дзень основани Сербски атлетски союз.
1697 – Одбула ше Битка при Сенти, єдна з найзначнєйших побидох християнского (австрийского) войска хторе предводзел принц Еуґен Савойски, над отоманским войском зоз хторим командовал султан Мустафа II. Побида зазначена на найвекшей слики на єдним платну у Сербиї, хтору намальовал Ференц Айзенхут (1857–1903) и виложена є 1898. року у будинку Скупштини општини у Зомборе (бувшим будинку Бачко-Бодроґскей жупаниї), дзе ше и нєшка находзи. Нєшка и Дзень општини Сента.
1880 – Народзел шe ґлумец Добрица Милутинович (Ниш, 11. септембер 1880 – Беоґрад, 18. новембер 1956). Бул член Народного театра у Беоґрадзе. Музей театралней уметносци и Союз драмских уметнїкох Сербиї запровадзели 1980. року награду за животне дїло у обласци ґлуми, хтора по нїм наволана Добрицов персцень.
1921 – Основани Югославянски атлетски союз, нєшка то Сербски атлетски союз (САС), хтори го формално правно нашлїдзел после розпаду Югославиї. Шедзиско Сербского атлетского союзу у Беоґрадзе
1962 – Британска поп ґрупа Битлси зняла перши синґл – Лав ми ду (Love Me Do).
2000 – Русийски и америцки космонавти Юрий Маленченко и Едвард Лу успишно закончели шейсцгодзинови виход до отвореней вселени на Медзинародней вселенскей станїци, понеже злучели два блоки станїци зоз пошореньом хторе фиксира маґнетне польо Жеми.
2001 – У самозабойнїцким нападу на Шветови тарґовински центер у Нюйорку и будинок Пентаґона у Вашинґтону, погинули коло три тисячи людзе. ЗАД за напад обвинєли Осаму Бин Ладена, лидера исламских екстремистох, хтори ше скривал у Авґанистану, и 7. октобра започали бомбардованє Авґанистану.