14. ЮЛИЙ – На нєшайши дзень народзел ше др Иштван Удвари.
1789 – У Паризу народ завжал гарешт Бастилю, символ монархиї. Тот дзень ше трима за початок Французкей револуциї, збуванє хторе направело заобраценє у европскей историї. У Французкей ше слави як националне швето.
1899 – У Паризу отримани медзинародни социялистични конґрес хтори орґанизовали марксистични партиї Нємецкей и Французкей. Основана Друга интернационала и принєшена резолуция о осемгодзиновим роботним дню и о преслави 1. мая.
1904 – Народзел ше писатель Исак Башевис Синґер (Леончин, Польска, 14. юлий 1904 – Серфсайд, ЗАД, 24. юлий 1991), єврейски писатель, добитнїк нобеловей награди за литературу 1978. року. Наградзени є зоз два Национални награди за литературу ЗАД, за литературу за дзеци и за мемоари.
1910 – Народзел ше аниматор Вилиям Денба Хана (Мелроуз, ЗАД, 14. юлий 1910 – Лос Андєлес, ЗАД, 22. марец 2001), бул америцки продуцент, редитель и мальовал филми. Од 1931. року мальовал епизоди Тома и Джерия, а зоз Джозефом Барбером отворел власни студио Хана и Барбера и продуковали телевизийни сериї Фамелия Кременко, Скуби-Ду, Медведзик Йоґи, Хики и приятелє…
1918 – Народзел ше Инґмар Берґман (Упсала, Шведска – 14. юлий 1918 – Фаро, Шведска, 30. юлий 2007), филмски, театрални и телевизийни режисер, сценариста и продуцент, добитнїк трох Оскарох.
1950 – Народзел ше др Иштван Удвари (Торньошпалц, Саболчски комитат, Мадярска, 14. юлий 1950 – 9. новембер 2005) лексикоґраф, педаґоґ, визначни мадярски слависта хтори у своєй науковей роботи виглєдовал историю руского язика и литератури и преподавал руски язик. Др Иштван Удвари дипломовал на Дебрецинским универзитету Лайош Кошут 1975. року, преподавал як професор у ґимназиї у Кишварди, и маґистровал 1981. року, а докторску дисертацию одбранєл 1987. року. Бул єден з иницияторох снованя рускей и українскей катедри на Педаґоґийним институту Дєрдь Бешенєя у Нїредьгази и од 1993. року та по шмерц вон бул єй шеф. Од 1995. року бул габилитовани доктор з историї славянских язикох и доцент на Сеґединским универзитету Атили Йожефа, а 1997. року достал ступень доктора Мадярскей Академиї наукох. Од 2000. року українско-русинска катедра, зоз професором Удварийом, здобула виши ступень акредитациї и длугши час була центер гунґаро-русинистичних студийох у Мадярскей. Др Иштван Удвари бул член Дружтва за руски язик и литературу у Новим Саду и участвовал на науково-фахових сходох Днї Миколи М. Кочиша. Др Иштван Удвари умар 9. новембра 2005. року у Нїредьгази.
1953 – Народзел ше о. Дюра Малїк (Коцур, 14. юлия 1953 – Винипеґ, Канада, 2. юний 2021). У українскей Папскей малей семинариї у Риме, у Италиї бул од 1968. по1973. рок, у українскей Папскей велькей семинариї св. Йосафата у Риме по 1976. рок, а потим по 1982. року у Василиянским манастире за студиї у Риме. Мастерс (лиценцият) зоз духовней теолоґиї здобул 1982. року на Терезиянским институту, а 1983. року є пошвецени за священїка у Винипеґу у Канади. Дипломовал зоз администрациї у бизнису. Помагал Християнски часопис Дзвони, а беоґрадскей парохиї подаровал златну чашу за Службу Божу.
1965 – Америцки сателит Маринер 4, хтори лансирани 1964. року, направел перши фотоґрафиї планети Марс.