21. ОКТОБЕР – На нєшкайши дзень oснована Руска матка.
1520 – Фернандо Маґелан пренашол морйоуз, хтори по нїм и достал мено Маґеланов морйоуз.
1772 – Народзел ше анґлийски писатель и филозоф Семюел Тейлор Колридж (Отери, Велька Британия, 21. октобер 1772 – Лондон, 25. юлий 1834), єден з найзначнєйших анґлийских литературних критичарох и романтичарских поетох.
1833 – Народзел ше хемичар, индустриялєц, филантроп и пренаходзач Алфред Бернард Нобел (Стокголм, Шведска, 21. октобер 1833 – Санремо, Италия, 10. децембер 1896), хтори зоз пренаходком динамита здобул огромне богатство. Жадал же би ше динамит хасновало за мирнодобски наменки, а з тестаментом охабел фонд од 9,2 милиони долари за додзельованє наградох за позарядово досцигнуца у физики, хемиї, медицини, литератури и закладанє за мир. Перши Нобелово награди Кральовска шведска академия додзелєла 1901. року, пейц роки по Нобеловей шмерци. Од 1969. року Академия додзелює и награду за економию. Награду за мир додзелює Нобелов комитет у Ослу.
1945 – Основана Културна добродзечна орґанизация Руска матка як єдинствена асоцияция Руснацох, хтора мала за циль унапредзовац културу и просвиту Руснацох/Русинох у Демократскей Федеративней Югославиї. Шедзиско Рускей матки було у Руским Керестуре, дзе руководзела зоз друкарню, а орґанизация мала и дванац одбори у малих варошох и валалох ширцом Войводини и Сриме дзе жили Руснаци. Престала исновац 1948. року.