28. ЮЛИЙ – На нєшайши дзень принєшени перши кромплї до Европи.
1586 – Томас Гериот принєсол перши кромплї зоз Колумбиї до Анґлиї. Концом 16. вику кромплї пренєшени и до Шпаниї. З початку ше их ховало як прикрасну рошлїну, алє пре звекшанє жительства, войни и гладу ширцом Европи почало ше их хасновац за костиранє.
1858 – Першираз похасновани оцисок пальца як знак идентификациї.
1821 – Република Перу (República del Perú) преглашелa нєзависносц од Шпаниї.
1899 – Народзел ше литературни и театрални критичар Велибор Ґлиґорич (Рипань, 28. юлий 1899 – Беоґрад, 3. октобер 1977), бул професор на Филозофским факултету Универзитета у Беоґрадзе и редактор вецей часописох, директор Драми Народного театра у Беоґрадзе (1945–1948) управнїк Югославянского драмского театра у Беоґрадзе (1948–1958), предсидатель Сербскей Академиї наукох и уметносцох (1965–1971).
1914 – Австроугорска обявела Сербиї войну и тот датум ше бере як початок Першей шветовей войни.
1919 – Основана Медзинародна астрономска уния, МАУ (International Astronomical Union, IAU), зоз шедзиском у Паризу (Французка). Орґанизация зєдинює национални астрономски орґанизациї зоз шицких часцох швета. МАУ у шветовей науковей заєднїци припозната як установа одвичательна за менованє гвиздох, планетох, астероидох и других нєбесних целох и зявеньох.
Нєшка Шветови дзень борби процив хепатитиса (World Hepatitis Day). Дзень установела Шветова здравствена орґанизация 2010. року.