На соботу „Смаки традициї”

автор Ан. Медєши
325 Опатрене

РУСКИ КЕРЕСТУР – Манифестация традицийних руских єдлох „Смаки традициї”, треца по шоре, и того року заказана за перши викенд у юнию, односно соботу 1. юния. Манифестация будзе отримана на желєней поверхносци коло Спортскей гали у Руским Керестуре, у чаше од 11 по 20 годзин, а у орґанизациї Здруженя гражданох „Руска скарбнїца”.

На даскелїх штрандох годно покоштовац и купиц богати вибор традицийних, руских єдлох, як сланих так и сладких, а попри деґустациї и купованя єдлох, нащивителє годни пазариц и сувенири и рижни ручни виробки зоз рускима мотивами. На єдним од штандох будзе птредставена и „Руска традицийна кухарка” по сербски у виданю НВУ „Руске слово”, у рамикох єй промоциї будзе отримана и практична роботня за дзеци, а наявене и змаганє у стародавних бавискох.

Кед слово о културно-уметнїцкей часци, присутним ше зоз шпиванками представя дзеци Предшколскей установи „Цицибан” з Руского Керестура, свой наступ потвердзели и чледни двох танєчних ґрупох, возросту од 1. по 4. класу основней школи, а на концу публики ше представя и млади музичаре, аматере Дома култури зоз своїм бендом.

Манифестацию орґанизує Здруженє гражданох „Руска скарбнїца”, зоз потримовку Покраїнского секретарияту за образованє, предписаня, управу и национални меншини-национални заєднїци, локалну самоуправу Општини Кула и єй Туристичну орґанизацию.

ПОВЯЗАНИ ТЕКСТИ