НОВИ САД – З нагоди урядового отвераня нових просторийох Заводу за културу войводянских Руснацох у Улїчки Матици сербскей число 15, у Новим Садзе як и з нагоди означованя 15 рокох иснованя Заводу, нa стреду, 7. юния, на 18 годзин будзе отримана програма зоз хтору урядово почнє робота тей Установи у новим, сучасним просторе.
Програма будзе зоз двох часцох: перше будзе проєкция телевизийного филма „Скорей як когут закукурика” Славка Виная чию реализацию потримал ЗКВР, а потим будзе Поетски вечар пошвецени нєдавно упокоєному велїканови писаного слова по руски Михалови Рамачови (1951–2023). Нашо поетове пречитаю єдну свою писню по власним виборе, а вец тиж по власним виборе, пречитаю єдну писню Михала Рамача. На тот способ зоз єдним скромним омажом ше укаже на Рамачову значносц за руску литературу у цалосци.