ДЮРДЬОВ – На треци дзень Крачуна у Грекокатолїцкей церкви Рождества Пресвятей Богородици у Дюрдьове, на швето св. Першомученїка и архидиякона Штефана после вечурнї котра була на 18 годзин и мированя, отримани гуманитарни Рождественски концер.
Вчера, пияток, 9. януара на концерту участвовал домашнї Церковни хор „Розанов” котри за тоту нагоду пририхтала руководителька Ксения Вереш и госци, квинтет „Огня Осєцкого” зоз Осєку зоз Републики Горватскей котрих пририхтал руководитель Оґнєн Здравкович.
На концерту домашнї Хор шпивал духовни писньошпиви и єдну народну руску крачунску коляду, а госцински Квинтет крачунски, духовни и народни шпиванки, єдну духовну шансону и псалам.
По законченю концерту, домашнї священїк о. Михаил Холошняй подзековал учашнїком на прекрасним наступу и подзековал госцинским же звелїчали Крачунске швето и збогацели означованє Дня Каритасу. Потим шицких поволал до церковней сали на брацкованє.
Концерт бул гуманитарного характеру понеже ше могло дац добродзечни прилог за Каритас и так помогнуц особи у потреби. Шкатули за добродзечни прилог и надалєй буду стац у бабинцу, на уходзе до церкви.
