ДЮРДЬОВ – Ваня Роман, школяр седмей класи Основней школи ,,Йован Йованович Змай” у Дюрдьове. Дюрдьовчанє го познаю як хлапца зоз благим ошмихом на твари, хторого мац дриля у кочику.
У тринастим мешацу живота, Ваньови дияґностикована такволана хорота крегких косцох (Osteogenesis imperfecta). Toта хорота ґенетске поремеценє хторе спричинює слабосц косцох, пре мутацию ґенох хтори задлужени за продукованє колаґена, хтори главни протеин у косцох. Ваня дотераз мал вецей як трицец преламаня, а и ноги му ше нєєднак розвивали, та му лїва нога кратша як права.
Пред двома роками, зложни Дюрдьовчанє назберали пенєжи за нєобходни операциї Ванї Романа, наздаваюци ше же тот шмели хлапец победзи свою хороту. И шицко ишло ґу тому. Нажаль, 3. марца Ваньови ознова попущели ноги и пришло до преламаня обидвох ногох. На лїву ногу му положени ґипс, а права нога му оперована 4. марца.
Тота операция виношела пейц тисячи и сто евра, и пенєж за ню назберани. Як гварели Ваньово родичи, на їх рахунку при Гуманитарней фондациї „Будз гумани” Александра Шапича остала єдна часц пенєжу од прешлей операциї, а пенєж назберани и у Грекокатолїцкей церкви Рождества Пресвятей Богородици у Дюрдьове.
Нажаль, хорота така же ше нїґда нє зна цо ноши дзень, а цо ноши ноц. Пре части потреби за медицинским лїченьом и интервенциями, на рахунку би вше требала буц одредзена сума пенєжу, же би Романова фамелия була порихтана на нєплановани трошки и нєочековани ситуациї.
Дюрдьовчанє и тераз енки орґанизовали рижни гуманитарни акциї же би помогли Ваньови. Єдни предавали мед, други рижни прикраски правени зоз технїку декупаж, а квецарня Луна Лу шицок заробени пенєж од предатих тулїпанох 17, 18. и 19. марца прешлїдзи на Ваньов рахунок.
Донацию мож уплацовац на рахунок Гуманитарней фондациї „Будз гумани” Александра Шапича, динарски рахунок: 160-6000000844056-66, девизни ЕУР: 160600000084407509, IBAN: RS351606 00000084407509, SWIFT/BIC:DBDBRSBG. Средства мож донирац и зоз посиланьом поруки 982 на 3030, цена поруки 200 динари.