Професорка музичней култури у Основней школи „Братство єдинство” у Коцуре, Саня Цап Копривица зоз Вербасу, народзена 1996. року у Вербаше. Основну школу „Светозар Милетич” и Нїзшу музичну школу – оддзелєнє клавир закончела у Вербаше. У Новим Садзе закончела Штредню музичну школу „Исидор Баїч”, а потим ше уписала на Академию уметносци у Новим Садзе, напрям музична педаґоґия. При концу є студийох, абсолвент є, а ма положиц ище єден испит.
Робота наставнїка музичней култури у Основней школи „Братство єдинство” у Коцуре єй перша у фаху. Кед пришла робиц, була класни старшина пиятей класи, а тераз єй школяре матуранти, закончели осму класу, та ше рихтаю далєй школовац.
Кед пред штирома роками почала робиц як професорка музичней култури у Коцуре, на поволанку членох хора КПД „Карпати” з Вербасу, хтори у тот час робели у ОШ „Братство єдинство”, як и дотедишнїх дириґенткох того хора, Єлени и Милени Алексич, почала робиц як дириґентка хора КПД „Карпати”. З вербаским хором рихтали народни шпиванки по руски и українски, а тиж и духовни писнї. Народни писнї шпивали на шицких найзначнєйших музичних манифестацийох при Руснацох и Українцох, як цо Фестивал рускей култури „Червена ружа” у Руским Керестуре, Фестивал українскей култури „Калина”, Хорски фестивал „Карпати” у Вербаше и на вецей програмох у дружтве „Карпати”. Службу Божу и коляди шпивали у Грекокатолїцкей церкви святого Владимира у Вербаше, як и у церкви у Коцуре.
Два роки була дириґентка того хора, а потим Саня, пре приватни обовязки, тоту роботу препущела Милени Алексич, хтора и тераз водзи хор КПД „Карпати”.
Нєодлуга потим, на поволану хористох, почала водзиц Церковни хор Грекокатолїцкей церкви Успения Пресвятей Богородици у Коцуре, а тераз у априлу було два роки як го водзи. На репертоару хора духовни и даєдни народни шпиванки, у зависносци дзе ше хористи рихтаю пойсц шпивац. На вецей заводи, углавним, на вельки швета, шпивали на Служби Божей у церкви у Коцуре, а пред Крачуном у Руским Керестуре шпивали коляди у Катедралней церкви св. оца Миколая и при чесних шестрох.
Саня з вельку дзеку роби зоз хором, бо и його члени дзечнє приходза на проби, барз су мотивовани, знаю и любя шпивац, наступац и путовац на фестивали, а тераз ше рихтаю шпивац у Служби Божей за кирбай у Коцуре. На дириґентскей роботи зоз коцурским хором Саню, кед мала други обвязки, периодично заменьовал Александар Планкош.
Саня люби грац на клавиру и шпивац, у роботи музичного педаґоґа ше намага младим ґенерацийом пренєсц цо вецей знаня з обласци музичней култури, а у роботи з хором ше вєдно намагаю пестовац и чувац нашу духовносц и традицию.
