НОВИ САД – У першим тогорочним, януарским числу часопису МАК велька повага пошвецена означованю Националного швета Руснацох. Так рамики хтори направела Сара Планчак инспировани зоз кнїжку Гавриїла Костелнїка „З мойого валалу“, а такой на початку видвоєни интересантни и значни информациї кед слово о живоце Руснацох у Сербиї.
У тексту „Банкар хтори ше нє гнїва – лєм шицко памета“ читаче можу пречитац о своїм еколоґийним оциску и длуству хтори кажди рок приходзи вше скорей.
Представени и бенд „Горуци кромпльочки“, а попровадзене и путованє младих до Италиї на Gen3 стретнуце младих. У Руским културним центру концом 2025. року приказани филм „Правна блондинка“, а Марина Тодич, хтора и участвовала на тим проєкту составела писню зоз преложених титлох.
Ту и родумованє на тему „Чи дружтвени мрежи забиваю автентичносц?“, а потим, даскельо боки далєй мож пречитац текст о медийней писменосци у хторим читаче преходза през рижни уровнї – свойофайтово манипулациї хтори исную у сучасних медийох.
Нова рубрика „Младосц, активносц, креативносц“ приноши приповедку о активистичним руху у Италиї хтори концом 2025. року приведол до побиди, кед закон у Италиї почал препознавац фемицид як окремне виновне дїло.
У новим року читаче годни обачиц и нови визуелни приступ у текстох. Праве прето, даєдни тексти у друкованим виданю змистово кратши, а цали текст читаче годни пречитац на сайту часописа МАК.