Нїґда сом нє розумел концепт Нового року и ниа, зоз 50 роками и далєй го нє розумим. Цала тота уйдурма у вязи зоз орґанизацию, кадзи за дочек, як, зоз ким, купуй тото, гевто, то ми вше було таке напарте и без даякого смисла же нє мож зоз словами розтолковац. Алє гайд, шицки у ша-ла-ла фазону, га нє будзеш ше озда вибивац, бегаш доокола, обавяш цо ци наказане, бавиш свою улогу радосного, новорочного „славлєника” и лєдво чекаш вечар.
И док ти тадзи-тамаль, ниа сцигол и вечар. Шицки зме супер и добре нам и праве тераз охабиме за собу шицки нєдобри ствари хтори ше нам случели и од пол ноци буду красни ствари. И вец пол вечара чекаш да ше поклопя мунтатови, та ше оганяш зоз людзми, жадаш им даяки ствари до хторих анї ти нє вериш, посилаю ше поруки доокола и о даяки пол годзини, лєбо годзину после, атмосфера ше почина змирйовац. Цали дзень розположенє рошнє, шицки зме шалєни и супер нам, бо као цошка ма буц на пол ноци и вец, кед пол ноци прейдзе заш єдно вельке – нїч. Добре, нє баш нїч, на остатнє число на датуму ше треба звикнуц, алє окрем того, нїч друге. Нєт награди за силне чеканє и дзвиганє атмосфери, гевти красни гормони хтори нам дзвигаю розположенє потрошени и вец нормално же починаме „падац”.
Нє похопце ме погришно, нє мам я проблем зоз людзми хтори ше знаю радовац на Нови рок и наисце уживаю у тим, любел бим и я мац тоту струну, та най и я так, алє нє мам ю. Мнє цалого живота, якош, баржей одвитує 1. и 2. януар. Шицко цихе и мирне, вилїзує ше рани од дочеку, кремпита одмека и єдина бриґа чи єст досц хлєба, млєка и кафи док дутяни нє отворя. Хор бечких хлапцох и штири скакальнї бонус за атмосферу опущованя. Кеди-нєкеди сцигнє даяка новорочна порука и то шицко, нєт стресу, наглих рухох, лєм мир и полнєнє батерийох понеже после тих двох дньох, айд шицко ознова: иста робота, исти людзе, иста власц, исти бриґи. У сущносци, шицко исте окрем остатнього числа на датуму, а то нє досц же би ше порушала вообще даяка конкретна пременка. За таке дацо треба запнуц, мрднуц ше, таргнуц, а за то треба мац дзеки и енерґиї. Наздавам ше же вам анї єдно нє будзе хибиц у 2026. року.
Становиска висловени у тим тексту виключно авторово и нє вше одражую ушорйовацку политику новинох „Руске слово”.