НОВИ САД – Нєшка, 21. септембра почина нова сезона у Сербским народним театре (СНП) у Новим Садзе зоз премиєру опери Антона Рубинштайна – „Демон”, на 19 годзин на сцени „Йован Дьордєвич”.
Опера „Демон“ Антона Рубинштайна, у режиї Дмитрия Бертмана и под дириґентску палїцу Жельки Миланович премиєрно будзе вивидзена нєшка, 21. септембра на 19 годзин, а на репертоару є и 23. и 25. септембра. Тема опери универзална, борба добра и зла, цмоти и шветлосци, ангелох и демонох и їх уплїв на люудски судьби.
У улоги Демона и Тамари буду: Стефан Хаджич, Стефан Павлович, Желько Р. Андрич, Люпка Рац, Мая Андрич и Мина Ґлиґорич; потим улоги маю и Ґоран Крнета, Бранислав Цвиїч, Стеван Каранац, Марина Павлович Барач, Вишня Радосав, Ермин Ащерич, Саша Штулич, Яна Цветкович, Виолета Сречкович и Михайло Славнич, участвує и Хор, Оркестер и Балет СНП.
На трибини Театрални бешеди: Вочи премиєри опери Демон, хтора отримана у СНП, участвовала и сопран Люпка Рац хторей додзелєна улога Тамари и з тей нагоди вона гварела же тота улога вимага вельки розпон гласа, тиж вельки спектер емоцийох, ґлумецке искуство и шлєбоду емотивного виражованя.