ДЮРДЬОВ – У рамикох програми 33. Днї Миколи М. Кочиша у Основней школи „Йован Йованович Змай”, вчера, 14. децембра отримана явна годзина зоз руского язика.
Школяре зоз руских оддзелєньох, як и школяре хтори руски язик уча як виборни предмет рецитовали стихи Миколи М. Кочиша, здогадли ше його живота, шпивали шпиванки компоновани на його стихи и виведли єден скеч. Школярох пририхтали учителька Єлена Кухар, наставнїца руского язика Мария Самарджич и наставнїца музичней култури Татиана Барна.
Зоз Дружтва за руски язик, литературу и културу Ирина Папуґа и Владимир Папуґа подаровали школяром, учительки Кухаровей, наставнїци Самарджичовей и до школскей библиотеки вецей виданя Дружтва.
