КОЦУР – У просторийох Церковней сали Грекокатолїцкей церкви Успения Пресвятей Богородици у Коцуре вчера вечар, 13. януара отримана промоция науковей моноґрафиї „Перши конфесионални школи на руским язику у Бачкей” проф. др Михайла Фейси и проф. др Александра Янковича. Окрем тей значней кнїжки, представени и Мурови календар за 2025. рок.
По словох предсидателя Рускей матки и Културно-просвитного дружтва ДОК – Нови Сад, и єдного зоз авторох спомнутей науковей моноґрафиї, проф. др Михайла Фейси, початок нового року по юлиянским календаре и дзень подписованя першого урядового документу о насельованю 200 руских грекокатолїцких фамелийох на тедишню пустару Вельки Керестур Месни одбор Коцур Рускей матки и Месни одбор Коцур Културно-просвитного дружтва ДОК – Нови Сад означел креативно. Моноґрафия представя перши конкретни резултат подписаного Протоколу о сотруднїцтве Шветового конґресу Русинох/Руснацох/Лемкох и Филозофского факултета, визначел др Фейса. Окрем того, представени и Мурови календар РМ и КПД ДОК – НС за чечуци 2025. рок, котри достал нови випатрунок.
На промоциї бешедовали рецензент кнїжки проф. емеритус Првослав Янкович, автор кандидат за професора емеритуса проф. др Михайло Фейса и руководителька проєкта „Меншински язики и литератури у АП Войводини – семиотични и културни у вибудови етнїчного идентитета” у рамикох хторого публикована Наукова моноґрафия проф. др Вирдїния Попович.
На концу промоциї, др Фейса шицким присутним подзелєл по прикладнїк представеней науковей моноґрафиї и мурови календар.
