НОВИ САД – Схадзка Скупштини Дружтва за руски язик, литературу и културу отримана у рамикох 35. Дньох Миколи М. Кочиша, 5. децембра у Заводу за културу войводянских Руснацох.
На початку схадзки пречитани стихи Миколи М. Кочиша Твердиня и отворена вистава зоз XXI Подобовей колониї Стретнуце у Боднарова 2025. року, хтора отримана у Ґосподїнцох, за хтору порихтани и провадзаци каталог.
Штварту схадзку Скупштини Дружтва отворел и водзел предсидатель Скупштини др Юлиян Рамач. Розпатрени точки зоз порядней дїялносц Дружтва: звит медзи схадзками, финансийни звит зоз 2024. року, Програма Дружтва за 2026. рок и Програма 35. Дньох Миколи М. Кочиша.
У другей часци означени рочнїци творительох зоз Календара Дружтва у 2025, а то: o. Йoван Хранилович, Стеван Боднаров, Оскар Кочиш, Владимир Рогаль, Дюра Варґа, Ирина Колєсар, Яким Сивч, Леона Лабош Гайдук, др Михайло Лїкар, Серафина Макаї, др Пол Роберт Маґочи, Жeлимир Пап и др Оксана Тимко Дїтко.
На схадзки, у єдней часци бул присутни и предсидатель Националного совиту Руснацох Стеван Самочета.
На пияток 12. децембра, тиж у Заводзе за културу войводянских Руснацох будзе отримани 7. науково-фахови сход Слово о словох.
