ДЮРДЬОВ – Штварти „Днї толеранциї Шайкашскей” отримани у орґанизациї Здруженя женох „Олория” з Дюрдьова.
У Етно хижи „Олория”, 24. октобра нащивительом представена вистава фотоґрафийох, народного облєчива и рижних старих предметох, а предсидателька Здруженя женох „Олория” Леона Виславски привитала присутних и одвитовала на питаня о виложених предметох, информовал нас Боґдан Виславски.
У Месней заєднїци отримани концерт, хтори отворела предсидателька Леона Виславски и представела исторю Здруженя „Олория” и його дїялносц, а о значносци Етно хижи „Олория” бешедовала историчарка Любица Отич. Програму водзела Александра Виславски, вона привитала госцох по сербски, руски, словацки, українски, мадярски и на ромским язику. На концерту наступел Мишани хор „Пасторала” зоз Жаблю под руководством дириґента Спасоя Зуровца, солиста зоз КУД „Калина” з Индїї Петро Закамарок. Наступели и рецитаторе: Мария Рамач рецитовала по руски, Анита Бечкеречки по мадярски и Лїля Цвиянович по сербски.
Здруженя женох „Олория” у маю уж организовало госцованє русинских/лемковских шпивацких ґрупох „Лопєнка” з Цисни з Польскей, и „Кичера” зоз Снинї зоз Словацкей, а концерти отримани у Жаблю и Дюрдьове. Тиж у юнию у Етно хижи организована промоция кнїжки „Там ми шицко” Ристи Тривуновича, Дюрдьовчана хтори дочасово жиє у Зєдинєних Америцких Державох.
Манифестация отримана дзекуюци донациї Покраїнского секретарияту за образованє, управу, предписаня и национални меншини – национални заєднїци АП Войводини.
