МИКЛОШЕВЦИ (ГОРВАТСКА) – Традицийни Крачунски концерт отримани всоботу, 28. децембра. Цаловечаршу програму зоз своїм присуством поздравели начальнїк општини Томповци Милан Ґрубач и миклошевски парох о Роман Ступяк.
Крачунски концерт отворели наймладши члени КУД „Яким Ґовля” Миклошевци, а участвовала и Женска шпивацка ґрупа. Попри домашнїх публики ше представели и госцуюци шпивацки ґрупи, Женска вокална ґрупа „Arsnovia“ чийо члени зоз Посавских Подґайцох и Райового Села и Женска шпивацка ґрупа КД Руснацох „Цвелфериї” зоз Райового Села.
Пайташе Андрей Пап зоз Миклошевцох на тамбурки и Золтан Ело зоз Чаковцох на мадярским традицийним инструменту – цитри, одграли вецей крачунски шпиванки. Дзецинска ґрупа „Пахульки” одтанцовала Жимски валцер, а Владимир Мишлєнович одшпивал „За щесце” зоз тоту шпиванку домашни нащивительом пожадали вельо щесца, здравя и любови за Крачун и у наиходзацим Новим 2025. року.
Орґанизатор Крачунского концерту КУД „Яким Ґовля” Миклошевци, а финансийно го потримал Совит за национални меншини Републики Горватскей, Союз Руснацох Републики Горватскей и Општина Томповци.
