НОВИ САД – Млади Руского културного центру у Новим Садзе намагаю ше своїм нащивительом понукнуц нови и интересантни змисти, а єдно з таких и „Квиз у Матки”, хтори отримани штварток, 13. фебруара.
Єдна зоз орґанизаторкох Марина Тодич гварела же то перши раз же направели квиз у Матки, алє то нє нова идея. Таки квизи уж було у Дюрдьове и у Коцуре, а понеже вона першираз орґанизує таки квиз, замодлєла Емилию Чизмар най єй помогнє обдумац питаня. Тема була традицийна и популарна култура Руснацох, а змагателє одвитовали на скоро 40 питаня з обласци музики, историї, єдлох, назви рижних предметох, гварела Тодичова.
На Квиз у Матки приявели ше лєм два екипи у хторих могло буц найвецей штверо змагателє, алє и попри тим атмосфера була одлична, визначую орґанизаторе. Победзела екипа „Руски дзивчата”, хтори як награду достали вечеру у Матки.
Плановане же би ше таки квизи поряднє орґанизовало у Матки, а окрем рускей култури и традициї теми у наиходзацих квизох буду и култура и традиция других народох.
