ШИД – У Руским доме, пияток вечар отримани рочни концерт Културно-просвитного дружтва „Дюра Киш“ на хторим аматере приказали єднорочну роботу секцийох.
Концерт отворела Старша шпивацка ґрупа хтора одшпивала державну гимну „Боже правде“ и шветочу шпиванку Руснацох „Браца Русини“ и тиж през вечар одшпивали ище даскельо руски народни шпиванки у провадзеню оркестра Дружтва.
На концерту наступели и школяре хтори уча руски язик з елементами националней култури у основних школох општини Шид, порихтала их наставнїца Наташа Еделински Миколка. Вони рецитовали писнї руских писательох и шпивали. З двома шпиванками ше як вокална солистка представела школярка Йована Петрович зоз Шиду.
Тиж як госци наступели и аматере зоз КУД „Яким Гарди“ зоз Петровцох и то фолклорна секция, вони одтанцовали даскельо руски танци.
Публика у полней сали Руского дома уживала у шпиванкох, рецитацийох и танцох, а друженє предлужене на коктелу после концерту.
