Отримани Спортски бависка „Яша Баков” – турнир у пикаду

автор В. Вуячич
296 Опатрене

НОВИ САД – У просторийох Руского културного центру у Новим Садзе, внєдзелю, 4. децембра отримани Спортски бависка (СБ) „Яша Баков” – турнир у пикаду. Участвовали и два хлопски екипи зоз Републики Горватскей зоз чим турнир мал и медзинародни характер.

На турнире участвовали седем хлопски екипи – „Петровци” з Петровцох, „Вуковар” з Вуковару, „Папивинґ д.о.о. Вербас” з Вербасу, КУД „Тарас Шевченко” з Дюрдьова, ФК „Искра” зоз Коцура и РКЦ Нови Сад зоз два екипи. Побиднїк була коцурска екипа ФК „Искра” зоз 1496 бодами. Друге место освоєла екипа „Папивинґ д.о.о. Вербас” з Вербасу зоз 1312 бодами, а треца РКЦ 2 Нови Сад 1311 бодами.

У поєдинєчней хлопскей конкуренциї найлєпши бул Златко Колєсар хтори ше змагал за ФК „Искра” зоз Коцура зоз 1392 бодами, друге место завжал Мирослав Дїтко з Вуковару зоз 1127 бодами и треци бул Иван Горняк з РКЦ 2 Нови Сад зоз 1097 бодами.

У женскей конкуренциї було штири екипи – „Папивинґ д.о.о. Вербас” з Вербасу, КУД „Тарас Шевченко” з Дюрдьова и два екипи РКЦ Нови Сад. Найлєпша екипа була КУД „Тарас Шевченко” з Дюрдьова, друга була екипа РКЦ2 Нови Сад и треца РКЦ1 Нови Сад.

У поєдинєчней женскей конкуренциї найлєпша була Тамара Балоґ хтора ше змагала за КУД „Тарас Шевченко” з Дюрдьова зоз 1046 бодами, друге место 979 бодами освоєла Ива Петкович зоз РКЦ 2, а треце Мария Хромиш зоз КУД „Тарас Шевченко” зоз 958 бодами. 

После змаганьох предсидатель Спортских бавискох Иван Папуґа найлєпшим уручел медалї и Подзекованя СБ „Яша Баков”, а друженє предлужене у приємней бешеди и друженю.

На нєдзелю, 11. децембра у Вербаше будзе змаганє у ґуґланю и штреляцтве.

ПОВЯЗАНИ ТЕКСТИ