ЖАБЕЛЬ – Општина Жабель и єй Општинска рада розписали явни конкурс за финансованє або софинансованє рочних програмох зоз обласци спорта у 2026. року. Приоритетни циль конкурсу спортско-рекреативни змисти и хаснованє постояцих ресурсох за розвой спорту у општини Жабель, як и змисти котри у интересу гражданох општини.
Конкурс розписани 9. януара и отворени є за активносци котри ґруповани до єденац обласцох, медзи нїма вибудов, отримованє або опреманє спортских обєктох на териториї локалней самоуправи, спортских теренох у населєньох… За набавку спортскей школскей опреми, додзельованє спортских наградох и припознаньох за посцигнути спортски резултати и доприношенє розвою спорта, за физичне воспитанє дзецох прешколского возросту, орґанизацию спортских случованьох и друге.
Општина Жабль за конкурс видвої 18 милиони и 200 тисячи динари и поволує спортски орґанизациї, спортски дружтва, здруженя и општински спортски союзи, ношительох рочних програмох у обласци спорту за 2026. рок котри задоволюю потреби и интерес гражданох у обласци спорту на териториї општини най придаю потребну документацию Спортскому союзу општини Жабель, найпознєйше по пондзелок, 26. януара.
Документацию треба придац директно до канцелариї Союзу котра ше находзи у будинку Општини Жабель (Улїца Николи Тесли 45, Жабель).
Вецей о конкурсу мож опатриц на тим ЛИНКУ на сайту Општини Жабель www.zabalj.rs.