ШИД – На спомин памятнїку „Сримски фронт“ при Адашевцох, вчера означени 12. април и 78-рочнїца од пребиваня Сримского фронту у Другей шветовей войни зоз державну церемонию.
Означованє почало з панахиду хтора служена у церкви св. Стефана Штиляновича блїзко при спомин комплексу, а потим делеґациї положели венци на памятнїк.
Венєц положел министер за роботу, занятосц и социялни и борецки питаня Никола Селакович. Делеґацию Општини Шид предводзел предсидатель Општини Зоран Семенович, та и представнїки Министерства охрани Сербиї, Покраїнскей влади АП Войводини, борецкей орґанизациї, дипломатского кору, ОШ „Сримски фронт“ зоз Шиду, предстванїки здруженьох и други.
У своїх бешедох министер Никола Селакович, предсидатель општини Шид Зоран Семенович и ґенерал Видосав Ковачевич спред СУБНОР Сербиї, здогадли на битки у сримскей ровнїни, хтори були закончуюца операция у ошлєбодзеню Югославиї, а тирвали длужей як шейсц мешаци.
Виведзена и пригодна уметнїцка програма у присустве борцох и їх потомкох и других нащивительох зоз цалей Сербиї.