РУСКИ КЕРЕСТУР – У Руским Керестуре тих дньох порушана гуманитарна акция за помоц Планчаковим, хтори жию на гранїци еґзистенциї, на старим салашу без струї и води, у нєадекватних условийох, медзи Кулу и Липаром.
Попри Каритасу, хтори уж даскельо роки помага тей малженскей пари углавним так же им донира єдзенє, до акциї ше нєдавно уключел и член Огньогасного дружтва, Йоле Бодо хтори жада тоту акцию у валалє подзвигнуц на кус висши уровень.
По його словох, приоритет треба же би бул обезпечиц Планчаковим струю и воду, та ше вон, зоз ище дзепоєднима членами Огньогасного дружтва, одлучели зберац средства за купованє аґреґату на анласер и електро материялу.
Як гвари Йоле, у його потерашнїх нащивох Планчаковим, однєсол им помоц од Конїцкого клубу Русин и поєдинцох з валалу, у форми поживових намирнїцох, а постарал ше и же би Планчаково достали поживу за статок, односно бетелїну, шено, и кукурицу за єдного коня, краву и швиню. После обезпечованя струї и води, гвари Йоле, планує ше Планчаковим оправиц и закрице же би салаш нє премакал, а тиж и обилїц и ошориц нукашньосц салашу.
Юлиян и Рожа Планчаково, хтори маю кус менєй як 80 роки, на салашу жию роками, там одховали и штверо дзеци, медзитим, пре старосц и хороту вецей ше нє можу старац о себе, та им помоц нєобходна.
Заинтересовани, можу дац помоц у форми пенєжу хтори ше збера у Каритасу и Землєдїлскей задруґи „Керестурска паприґаˮ дзе поставена шкатула за донациї, а за подробнєйши информациї о помоци коло акциї, мож контактовац Йолея Боду на число телефона 061/169-74-13.
