Зоз насловом „Дом култури у Вербаше у новим руху” ознова ше наявює ушоренє главней културней институциї у Вербаше, хтору ше будує уж 34 роки. Кед сце такой подумали же то добра стара кампаня – наявиме же поробиме Дом култури – ганьбце ше! То лєм наява за ушоренє площи ОПРЕЗ Дома култури. Ша озда уж шицким ясне же исти нє будзе нїґда вибудовани, бо и тото цо стої 30 роки, препадло. Тото цо ше наявює кошта 6 милиони динари и будзе мац фонтану и годзинку хтору нїхто нє вимагал, нови места за шейтанє и шедзенє хтори тиж маме, лєм анї на тих нїхто нє шедзи, вонкашню сцену тиж нєпознатей наменки (спомла сом уж же Дом култури 34 роки нє маме?) и бавилїще, и рошлїни хтори тиж маме, алє нє отримуєме.
Кед слово о стварох хтори нїхто нє питал, нєдавно у Торжи бул печени буяк и шатри, єдзенє и пице задармо, забава, музика, аниматоре за дзеци и толкованє першого чловека СНС странки же шицки хторим ше тото нє пачи, знїщоваче Сербиї – ґратис. И так… Достанєме тото цо зме нє питали, або уж маме, плус годзинка и печени буяк, алє тото цо нам потребне нє достанєме, бо хто нас чує, кед ше лєм єдного слуха.
А цо зме питали (список пошоровани по импресиї): Процивкаменцово ракети! Бо знова суперкелийска буря до дна дотлукла урожаї ширцом Войводини… Други парасти и далєй поцерпаю.
Помоц фамелийом зоз дзецми зоз почежкосцами у розвою! Бо два мацери нєдавно гладовали!? Ратуюци права свойого хорого дзецка.
Стоп автократиї у образованю! Бо ище єден професор Филозофского факултету у Новим Садзе пре иншаки становиска достал одказ, а у елитней ґимназиї аж 36 професоре вецей нє робя пре рижни причини.
Судство у служби гражданох! Бо єден Ячимович у гарешту пре кари хтори нє зробел, а єден начальнїк вишол з гарешту пре забойство хторе направел.
Полицию у служби гражданох! Бо иншак шедза и робя з дилерами и криминалцами, а ґу гражданом найшвидше приходза кед потребне биц.
Здравство у служби гражданох! По упут и специялисту нє прейґ куми, шовґра або коверти, алє системи.
Инситуциї у служби гражданох! Бо кажде у державней системи муши робиц за чловека, а нє за власц!
И „Червену ружу” и нови кнїжки! Бо є мойо и нє дам! Бо их можеме плациц и з „Доброгодабра”, алє перше з буджету хтори и ми полнїме!
Становиска висловени у тим тексту виключно авторово и нє вше одражую ушорйовацку политику новинох „Руске слово”.