РУСКИ КЕРЕСТУР – Фодбалски клуб „Панонияˮ зоз Лалитю, того викенду, всоботу, 18. новембра, у Руским Керестуре по першираз орґанизовал турнир за младши катеґориї у фодбалу на хторим участвовали дзеци 3. и 4. класи основних школох. У Спортскей гали, за 1. место борели ше вецей як 30-еро дзеци зоз трох фодбалских клубох – домашнї ФК „Русин”, ФК „Панония” и ОФК „Оджак”, а побиднїцки погар освоєл домашнї Русин.
У Русиновим составе наступели – Страхиня Кршич, Тони Сивч, Лука Зелич, Андрей Надь, Иван Надь, Давид Гарди, Давид Колошняї, Даниел Фейди, Стивен Банич, Кристиян Чонка и Тони Надь. Тренер Зденко Шомодї.
Турнир ше бавело по системи кажде з каждим, а перше стретнуце одбавел домашнї Русин процив Оджаку, у хторим русиновци победзели госцох з резултатом 4:1.
Аж три ґоли на тим стретнуцу дал Давид Гарди, а єден дал и Тони Надь.
Шлїдуюци на паркету наступела екипа з Оджаку процив Панониї, дзе Оджак победзел з резултатом 5:1.
У трецим, остатнїм, змаганю младим русиновцом би за перше место досц бул и нєришени резултат, медзитим, вони заш лєм жадали побиду. Домашнї Русин ознова надвладава Оджак, тераз зоз меншу предносцу од 2:0, дзе єден ґол дава Тони Сивч, а други Тони Надь.
З нагоди 100-рочнїци клубу Русин, у Спортскей гали ознова буду орґанизовани даскельо турнири, а перши у плану такой у викенду пред нами на хторим наступя дзеци народзени 2012. року. За процивнїка поволани ФК „Младосцˮ з Крущичу и ФК „Душан Силниˮ з Вербасу, та ше екипи ознова буду змагац за перши три места.
