ДЮРДЬОВ – Тогорочна тлачидба ярцу у дюрдьовским хотаре почала штредком тижня. Нєт вельо поля зашати зоз ярцом, остатнї роки садза го лєм тоти цо тримаю статок.
Польопривреднїк Милош Тешич за Рутенпрес гварел же заренка крашнє наляли и же того року начурело вецей як влонї. Вон ище додал же тому допринєсла вигодна хвиля и дижджи у маю, а и же на польо руцел статков гной.
У дюрдьовским хотаре того року просеково чури медзи 35 и 42 метери ярцу по ланцу, просек прешлих рокох бул медзи 36 и 38 метери по ланцу.
Землєдїлци гваря же жито и кукурица випатраю добре, бо у маю бул добри баланс слунечних и жимних дньох, а було и досц дижджу.
Початок тлачидби жита ше обчекує концом мешаца.