Почина театрална роботня „Цо пожадам, тото можем буцˮ

автор Ол. Живкович
321 Опатрене

РУСКИ КЕРЕСТУР – У Велькей сали Дома култури Руски Керестур (ДКРК) през викенд 23. и 24. септембра будзе театрална роботня „Цо пожадам, тото можем буцˮ. Роботня ше будзе одвивац на соботу и нєдзелю од 14 по 16:30 годзин у зависносци од числа приявених дзецох.

Роботню буду водзиц Адриана Надь Барна, Ксения Бодянец, Ивана Зазуляк Папуґа, Таня Арва Планчак, Владимир Надь Ачим, Желько Пашо и Таня Орос. Участвовац можу шицки дзеци другей, трецей и штвартей класи основней школи.

Циль проєкту же би ше дзеци упознали зоз ґлуму, театром, процесом поставяня представи, задатками членох ансамблу и технїки на бини и споза нєй, алє и зоз бонтоном патрачох, дознаю кельо публика значна за театер.

На роботнї ше будзе робиц ґлумецки вежби, вежби за дикцию и правилне вигварянє, алє и облєкац костими, научи ше хто суфлер, як намесциц сценоґрафию у цмоти и подобне.

Родичи заинтресованих дзецох ше можу явиц на телефон 064/528-25-38, або до приватного порученя на Фб боку Адриани Надь Барна.

Роботня будзе реализована у сотруднїцтве зоз Здруженьом младих „Пакт Рутенорумˮ и ДКРК, а зоз потримовку Заводу за културу войводянских Руснацох.

Надпоминаме же роботня безплатна.

ПОВЯЗАНИ ТЕКСТИ