НОВИ САД – У Диґиталним младежским центру (Войводи Путнїка 1), предсидатель Покраїнскей влади Иґор Мирович додзелєл контракти за суфинансованє двацец двох глашнїкох на язикох националних меншинох. Контракти подписали представнїки зоз дзевец видавательних хижох: Мадяр со, Хет нап, Глас люду, Либертатеа, Руске слово, Хрватска риєч, Бунєвацки новини, Македонски информативни центер и Ридне слово.
Войводина приклад заєднїцтва и сотруднїцтва покраїнских институцийох и тих цо заняти у новинох на меншинских язикох, гварел предсидатель Покраїнскей влади Иґор Мирович и додал же на початку його мандату, 2016. року, видвоєне кус вецей як 260 милиони динари, влонї 390 милиони, а того року 490 милиони динари. Мирович наглашел же таки модел директного субвенционованя єдинствени нє лєм у реґионалних алє и у европских рамикох.
Предсидатель Мирович здогаднул же у тим року значна помоц будзе унапрямена и на будинок Радио-телевизиї Войводини у Сримскей Каменїци, дзе ше продукує програму на 15 язикох националних меншинох хтори жию у Войводини. Тота помоц оможлїви же би ше и информативна програма Телевизиї преселєла до нового обєкту по 1. септембер, або найпознєйше по 1. октобер.
Новинско-видавательна установа „Руске слово” того року достала 26 одсто вецей средства од Влади Автономней Покраїни Войводини, цо у велькей мири покриє трошки нєобходни за друкованє новинох, функционованє Установи и виплацованє плацох, виявел директор НВУ „Руске слово” др Борис Варґа. Вон ище додал же проблем настал прешлого року пре обєктивни причини кризи, скоку ценох, як пошлїдок войни у України и подрагшаня сировини и общей инфлациї. Були забриґовани як риша проблем, та векшина новинско-видавательних установох зєдинєли вєдно моци и глєдали од держави векши средства. Без потримовки держави, нашо медиї би ше чежко могли отримац на тарґовиску. Алє и информованє на язикох националних заєднїцох то часц явного интереса у Републики Сербиї и часц прегваряцкого процесу до ЕУ, гварел директор Варґа.
На додзельованю контрактох присуствовала и Драґана Милошевич, покраїнски секретар за културу, явне информованє и одношеня з вирскима заєднїцами.
