ШИД – У церкви Преображеня Господнього, а пред постом, всоботу 1. марца означене такволане Пущанє, традицийни обичай и то з виводзеньом Христовей кресней драги хтору виведли дзеци, а порихтали их о. Доминик Ралбовски, парох у Бикове при Суботици и шестра Кристина.
Дзеци зоз Селенчи, Плавни и Бачу як и домашнї през 14 слички представели подїї од осудзеня Христа на шмерц, його мученє и трапенє и розопинанє на криж по кладзенє до гроба.
Молитву читал о. Владимир Еделински Миколка, парох з Беркасова, а кажду сличку зоз шпивом наявйовала шестра Кристина.
Означованє Пущаня предлужене у Руским доме зоз послуженьом зоз пампушками, як то обичай з тей нагоди, и з концертом бенда „Горуци кромплї“ зоз Руского Кереструра, зоз хторим руководзи Сашо Палєнкаш у рамикох Дома култури Руски Керестур. Окрем госцох хтори грали и шпивали, єдну шпиванку „А я така чарна“ одшпивала интерпретаторка Йована Петрович зоз Шиду.
