НОВИ САД – Представа „Пребудзени: 11 ½ стари жени”, авторки и редительки Бранки Баїч Йованов, вчера 3. априла одбавени треци раз на Велькей сцени Културного центра Нового Саду.
У представи, хтора уметнїцки анґажовани театрални процес, место ґлумцох у главних улогох 11 жени старши як 65 роки, хтори бешедую и указую на спокуси стареня, стереотипи зоз якима ше вони зочую и дискриминациї яку доживюю як старши жени. Фокусирани важни животни преход зоз активного роботного вика до пензионерского часу и зочованє зоз животом без партнера як и одношенє одроснутих дзецох ґу старим родичом.
Жени хтори участвую на бини ше добродзечнє одволали на явну поволанку, а у представи похасновани рижни методи и технїки применєного театра. Представа ма окреме дизайновани часци кед ше комуникує зоз публику и повязує зоз проблемами яки маю старши особи.
Зоз Бранку Баїч Йованов, як авторку и редительку представи, коредитель и кодраматурґ Лазар Йованов. У представи участвую: Славица Страценски, Светлана Селакович, Станка Парач Дамянович, Наталия Маринкович, Ясна Карталович, Милена Маринкович, Любица Янков, Миряна Миланков, Милка Дмитрасинович, Драґица Летич и Вера Ердевик.
Представа докторска уметнїцка робота Бранки Баїч Йованов, докторанткинї Академиї уметносцох у Новим Садзе, под менторством проф. др ум. Ивана Правдича. Бранка Баїч Йованов самостойна драмска уметнїца – ґлумица и драмска педаґоґиня.
