РУСКИ КЕРЕСТУР – На штварток, 20. юния на 18 годзин у Клубу 10 Дома култури у Руским Керестуре, будзе виведзена премиєра новей представи за дзеци Руского народного театру „Петро Ризнич Дядя”, з тей нагоди под насловом „Инсталуй и ти дїдов джи пи ти (GPT)”.
Слово о интерактивней представи витвореней по текстох Ирини Гарди Ковачевич и Славка Ороса, чия основна намира же би виратовала зоз забуца, зачувала и пояшнєла велї руски присловки, фрази и рижни словни конструкциї и стилски фиґури хтори млади ґенерациї, а окреме дзеци, уж вше менєй хасную, а хтори творя богатство нашого язика.
Идейни автор проєкта Славко Орос, а представу виведзе уж стандарна екипа нашого националного театру, на чолє зоз єй доаєном – Емилом Нярадийом, хтора у предходних рокох уж реализовала вецей проєкти за дзеци, у рамикох циклуса под назву „Вандровкаш”.
Режию подписує Владимир Надь Ачим, а з тей нагоди тот ансамбл будзе мац помоц и младей композиторки и шпивачки Кристини Афич, хтора вєдно зоз шпивацку ґрупу виведзе и специялни сонґ написани за тоту представу.
Проєкт финансийно потримали Буджетски фонд за национални меншини – Миистерство за людски и меншински права и дружтвени диялоґ, Покраїнски секретарият за образованє, управу и национални меншини – национални заєднїци и Национални совит рускей националней меншини.