БАЧИНЦИ – На швето святого апостола и евангелисти Луки вчера 31. октобра, церква преславела свойо храмове швето Кирбай.
Архиєрейску службу Божу предводзел преосвящени владика кир Георгий Джуджар, а сослужовали о. Михайло Режак зоз Шиду, о. Владимир Еделински Миколка зоз Беркасове и о. Михайло Шанта и о. Владимир Медєши зоз Руского Керестура.
У казанї преосвящени владика медзи иншим визначел значносц апостола и евангелисти Луки у християнским живоце хтори ширел слово Боже, алє и написал и описал живот Исуса Христа.
На Служби Божей апостол читал Андрей Рац, Евангелию о. Михайло Шанта, а церковне шпиванє предводзели бачински парох о. Юлиян Рац и новосадски парох о. Дарко Рац, а тиж крашнє шпивали и вирни.
Парох о. Юлиян Рац подзековал владикови же пришол возвелїчац Кирбай и же надихнуто наказовал, а тиж подзековал и шицким паноцом, часним шестром, панїматком и вирним домашнїм и госцом же пришли преславиц Кирбай.
После Служби Божей бул традицийни обход коло церкви зоз читаньом Евангелийох на штирох бокох швета у чим ше придружел и парох зоз Петровцох о. Владимир Седлак як и парох Сербскей православней церкви у Бачинцох о. Бранислав Лукич, а на концу одшпиване Многолїствиє.
