ДЮРДЬОВ – У Основней школи „Йован Йованович Змай” у Дюрдьове, пияток 24. новембра, преславени Дзень школи зоз пригодну програму.
Програма була конципована так же през танєц, шпиванку и рецитацию школяре представели живот и дїло того визначного писателя. Директорка школи Любица Клепич зоз пригоднима словами повинчовала Дзень школи шицким школяром и занятим.
Того року школа у Дюрдьове преславела сто петнац роки образованя и воспитаня, а седемдзешат осем роки як ноши мено найпознатшого писателя за дзеци.
Школяре пиятей класи руского оддзелєня на програми виведли кратки скеч.
З нагоди Дня школи, алє и у рамикох проєкту ,,Вєдно ґу штреднєй школи” Дюрдьовчанє були госци двом школом, зоз Лесковцу и Алексинцу.
Школярох руских оддзелєньох, як и школяре хтори уча руски язик зоз елементами националней култури, за тоту шветочну нагоду порихтали учителька Єлена Кухар и наставнїца руского язика Мария Самарджич.
