НОВИ САД – На швето Нєпорочного зачаца Пречистей Дїви Мариї, 22. децембра у Провинцийним доме шестрох Служебнїцох Непорочней Дїви Мариї зоз святочну Архиєрейску Службу Божу преславени Кирбай.
Службу предводзел владика кир Георгий Джуджар, а зоз нїм сослужовали двоме священїки зоз Кули, о. Дамян Кича ЧСВВ и о. Платон Салак ЧСВВ и парох новосадскей церкви о. Дарко Рац. Дзияковал Йовґен Надь, а шпивали и шестри Служебнїци.
Пред красним числом парохиянох и шестрами Служебнїцами зоз рижних местох, на початку настоятелька манастира Мартина Кмита привитала владику и присутних, а потим владика у казанї потолковал цо значни слово „нєпорочне” и же нас тото швето водзи на початок спашеня историї людства. Мария друга жена хтора охранєна од гриха, гварел владика, и вона остала вирна Богу у шицких спокусох и виправела тото цо зробела перша жена Ева, бо ю Бог вибрал за мацер свойого Сина и прейґ нєй пришло спашенє цалого людского роду. Владика ище додал же тото швето можеме наволац и швето духовней краси Божей Мацери.
На тот дзень два шестри Служебнїци дали и свойо обити, на концу Служби ше одшпивало многолїтствиє, а потим ше шицки вєдно дружели на аґапеу.
