ДЮРДЬОВ – У 12. колу Подручней фодбалскей лиґи Нови Сад, хторе одбавене 29. октобра у Дюрдьове, фодбалере ФК „Бачка 1923” зоз Дюрдьова победзели у стретнуцу зоз фодбалерами Гайдука зоз Чуроґу, зоз резултатом 5:2.
Стретнуце обидва екипи почали барз добре, а посцигнуц перши ґол на стретнуцу ше удало госцом, у 15. минути. До конца першого полчасу домашня екипа мала два барз добри нагоди, алє мрежа процивнїцкого ґолу остала нєдорушена.
У другим полчаше фодбалере Бачки бавели ище лєпше и удало ше им посцигнуц аж штири ґоли за дванац минути. Перши ґол за Дюрдьовчанох посцигнул млади Рац у 55. минути, а Роґич посцигнул аж три ґоли и то у 60, 64. и 67. минути. После приятого и штвартого ґолу, концентрация Чурожаном опадла, алє зменшали розлику у 73. минути. До конца стретнуца, Дюрдьовчанє посцигли и свой пияти ґол, у 80. минути.
На стретнуцу додзелєне и вельо жовти картони, пейц госцом и єден фодбалерови Бачки.
После того кола Бачка на дзевятим месце на таблїчки зоз осемнац бодами. У шлїдуюцим колу дюрдьовских фодбалере ше стретню зоз фодбалерами ФК „Шайкаш 1908” зоз Ковилю.