РУСКИ КЕРЕСТУР – Финансийни план Националного совиту рускей националней меншини (НСР) за 2023. рок прилапени на вчера вечар отриманей 5. схадзки НС, хтору водзел предсидатель Йоаким Рац. Совит тиж дал и позитивне думанє о звитох и планох Заводу за културу войводянских Руснацох.
О Звиту о роботи и закончуюцим рахунку за 2022. рок як и Предкладаню финансийного плану и активносцох Заводу за 2023. бешедовал директор Заводу за културу Сашо Сабадош. Приоритетни активносци у наиходзацим периодзе за Завод будзе його преселєнє до нових просторийох у Матици сербскей, а од програмских змистох нова будзе ушоренє и обробок Заводовей библиотеки.
Финансийни план НСР за 2023. рок прилапени зоз векшину гласох од присутних членох, з тим же ше гласало и за иншаке предкладанє плану хторе предложел проф. др Михайло Фейса, хторе нє прилапене.
Финансийни план зробени на основи прешлорочних средствох хтори НСР доставал зоз републичного и покраїнского буджету, як и зоз буджетох шейсц локалних самоуправох дзе робя подручни канцелариї НС. Вони вкупно виноша 15.352.787 динари, а дзеля ше на два єднаки часци, єдна то порядна дїялносц, а друга стаємни трошки.
Понеже ище вше нє познати виноси хтори НСР достанє за 2023. рок, а анї му нє буду напредок и вкупно наявени, финансийни план зробени на основи прешлорочного прилїву. На схадзки прето наявене же будзе мушиц буц и ребаланс предвидзеного буджету док ше оформя шицки одбори и роботни цела нового зволаня совиту и конкретизую їх програми и активносци.
