ОПШТИНА ШИД – У грекокатолїцких церковх у општини Шид, Воскресенє Христове торжествено означене зоз молитву и богослуженями.
У Шидзе у церкви Преображеня Господнього парох о. Михайло Режак служел служби на Вельки штварток потим на Вельки пияток и покладанє плащанїци до Христового гроба як и нa Вельку соботу кед служена вечарша служба зоз Воскресну утриню.
На перши дзень швета на Вельку ноц шветочна Служба Божа служена на 10 годзин, а потим у порти пошвецени кошарки зоз паску и вельконоцним єдлом.
Служба Божа була и пондзелок, а после богослуженя було мированє, на 10 годзин Слуба Божа будзе служена и на вовторок.
У Церкви собор святого архангела Михаила у Беркасове парох о. Владимир Еделински Миколка на Вельки пияток отримал обряд покладаня плащанїци до Христового гроба, а на Вельку ноц Служба Божа зоз пошвецаньом кошаркох служена на 10:30 годзин.
У церкви Успеня Пресвятей Богородици у Бикичу тиж на Вельки пияток бул обряд покладаня палщанїци до Христового гроба, а внєделю на перши дзень швета Служба Божа служена на осем годин, а потим пошвецени кошарки зоз пасками у порти.
У обидвох церквох о. Еделински служел Служби Божо и пондзелок, други дзень швета, а по традициї пополадню бул благослов гробох на теметовох перше у Беркасове, а потим и у Бикичу.
